28/9 @ 腫瘤科/電療

由於安排0800做CT, 昨晚零晨反不可進食, 黠知等到10點都未有人入房, 只見房間工作人員行行笑笑, 10點半,正式入第一個, 我要等到12點半先入, 入到去, 瞓係上次個半身模, 其餘上半身瞓係張凍到飛起既鋼板上面, 雞皮都起晒, 佢地用MARKER你我身上畫線, 最後仲搵1個紋身咁點咗4點。仲要聽到個工作人員講, 今日上午一定超時,我心唸, 你地準時0800開始, 就唔會超時啦。

26/9 @ 腫瘤科/電療

26/9 @ 腫瘤科/電療
做完心電圖,再去見醫生, 知道提早10月中可PETSCAN, 醫生便開始啟動電療程序, 28/9做電腦掃瞄。見完醫生後去另一個房做上半身模型,電療時需要用的, 好大膠味, 不過D泥好暖, 瞓時熱熱地, 好舒服。

覆診@3K

22/9  @3K

將電療科醫生既說詬轉述給血液科醫生, 再同醫生表明自己既憂慮,醫生即打去QE,睇下PETSCAN可唔可以改早些, 咁可以早D安排電療，最後將11月 7日改為10月19日，這可以就到10月中開始電療。

電療...WTF

腸無事, 又要排期電療, 真唔明點解唔可以一次唸多2步, 永遠做完一先唸二,病人只有等, 我真係唔想好似之前講個女病人咁, 因為延遲治療而死。

見到電療醫生, 佢話最好時間是化療後電療, 仲話而家隔咗咁耐太遲。太遲?真係好火, 唔係你地唔好好計劃, 我駛等咁耐!!!!

仲話而家排都要10月尾, 叫我地自己決定,或者同醫生商量下,會唔會做埋11月頭既PETSCAN先 ...我自己知道點做,自己決定到, 駛要你呢D醫生,問專業意見, 即耍太極。真係火都出。最後決定照排, 遲D先答佢。

醫生原來唔係醫你, 而係你出事先救你。

照腸colonscopy

上一次是6年前照, 第一天痾到傻,第二天餓到死。今次,早3日要食低纖餐,冇菜冇水果,但每天那2000ml既瀉水,難飲到呢,每15分鐘250ml,每天1000ml,第 一天是晚餐後飲,整晚冇痾, 第二日就痾到, 水箱都未回水已再入廁所, 仲要飲埋另外1000ml, 8點幾痾到11點, 瞓咗係床瞓著咗, 1點半起身,準時2點半去見醫生。3點半準時到醫院,4點半開始做, 整個過程都於後期醒醒地, 後黎姑娘話我知, 我D腸好難照,要轉黎轉去先照得晒。 

於9月2 日知道,那3粒只是普通瘜肉。感恩。